السبت، 7 سبتمبر، 2013

أنتَ الدفا





عارف يـارب نفسى ألقاك و أحضنك
و تحتوينى بضمتك و برحمة تقفل عليا قبضتك
و قلبى يبكى بخشوغ فـ سجده شكر لحضرتك
و تصبح الروح سارحة فـ طريقها لجنتك

عارف يـارب عندى ليك حنين
و بتمنى أعود لمرحلة ما قبل الجنين
و أفضل معاك هنا فـ حضن الكون
و أتولد هنا وسط الملايكة و الانبيا

عارف يـارب واحشنى منك الدفا
و بتكسف من نفسى لما بغلط فـ الخَفا
وأصلى بـ بُكا و أدعى تتوب عليا ..
أنك تجنبى كل مَحبة مُحرمة
و تنزع من قلبى كل شهوة مُهلكة
و تحبنى و تحببنى فـ الخير و ترزقنى الرضا
و تزرع بذور عملى فـ جنتك تكبر فروعها
و تصبح شجرة خضرا تمتد للسما
تطرح نوّر و ضىّ و حُب و أمل
و يوم اللقا أهديها لحضرتك

عارف يـارب بحب أكون فـ حَضرتك
وقت الآذان و قراءة القرآن و الدُعا
و الصلاة مابين الفجر و الضُحَى
فـ صوت موسيقى مُلهمة
و بين حروف كلمة طيبة
و ضحكة طفلة صُغيرة

عارف يـارب حُبك طهارة و شفا و صَفا

عارف يـارب بتمنى أحضنك و تحتوينى بضمتك
أصل يـارب و احشنى لقاك واحشنى بقُربك الدفا

حُضنك دفا , ذِكرك دفا , عقابك دفا , رزقك دفا

أنتَ الدفا .. و الدفا فينا منك .. و دفاك كفَى

نورهان محمود

بدايات سبتمبر 2013

هناك تعليق واحد: